الحذر و كلّ الحذر من هؤلاء٠٠٠

ديسمبر2005...كانت سنتي الأولى أنذاك بكليّة العلوم القانونيّة والسياسيّة و الإجتماعيّة و في ديسمبر آلتحقت بمجموعة من الرّفاق نناضل في إطار الإتّحاد العام لطلبة تونس نصرة لحقوقنا و حقوق غيرنا من الطّلبة٠٠٠أقول ديسمبر لأنّه و للأسف الشّهر المناسباتي الوحيد الذّي يلتفّ فيه مناضلو الإتّحاد حول بعضهم البعض متجاوزين بذلك نسبيّا مرجعيّاتهم السياسيّة٠٠٠ في إطار إنتخابات المجالس العلميّة ورغم أهميّة الإتّحاد النقابيّة و دوره التّاريخي و الطلائعي إلا أنّنا كنّا قلّة قليلة نناضل بين عيون مستغربة و أخرى مستنكرة ممّا جعلنا في غالبيّة الأحيان ننعت شباب كليّتنا بالغباء و اللا وعي٠٠٠كيف لا والغالبيّة السّاحقة من رجال قانون المستقبل هجروا الكليّة و إن أتوا درسوا كالآلات ثمّ آحتسوا قهوة مريرة و غادروا على الفور٠٠٠واقع مرير شهدته الجامعة التّونسيّة لا أنكر ذلك لكنّ الأمرّ هو أن ينظر إليك من تناضل لأجل حريّاته و كرامته وثقافته الوطنيّة على أنّك "جبري"٠٠٠و يحتفل بفوز ممثّل طلبة التجمّع (رغم ندرة حدوث ذلك)في آنتخابات المجالس العلميّة،بالزّغاريد٠٠٠!!! نعم بالزّغاريد و الهتافات بحياة مخلوعهم بن علي٠٠٠ لم أعرهم سابقا أيّ أهميّة لكنّي أخافهم اليوم٠٠٠أكاد أعرفهم فردا فردا لكنّي لم أعد أعرفهم فقد لبسوا جميعهم ملاءة النّضال و الوطنيّة و تملّكوا بالثّورة ٠٠٠نعتوا النّظام السّابق بالفساد فهل من الفساد الذهاب مجّانا إلى الحمّامات لقضاء عطلة نهاية أسبوع تجمّعية فيما غيرهم يناضل من أجل طبق أكلة جامعيّة؟؟؟

أتذكّر أنّنا قضّينا ليلة من الإعتصام في الكليّة من أجل حقّ رفيقنا أيّوب الغدامسي في التّرسيم و حاصرنا البوليس وحدث ما حدث٠٠٠إلا أنّه و في صباح الغد رأينا جموعا من الطّلبة تجوب الكليّة كأنّ شيا لم يحدث٠٠٠

لن أعود بالزّمان كثيرا إلى الوراء٠٠٠فمنذ حوالي السّنة تركّز الأمن الجامعي بالكليّة وتحرّكنا ضدّه و ضدّ بولسة الجامعة للحفاظ على هيبتها واستقلاليتها و ما كان من هؤلاء(مناضلو اليوم٠٠٠قفّافة الأمس) إلا أنّهم اتّهمونا بتعطيلهم عن الدّراسة٠٠٠!!!!!!!!!

لا أفهم تحديدا ما يجري هذه الأيّام لكنّي أتمنّى أن تكون هذه الصّحوة صادقة و ليست آنتهازيّة لمجرّة إمتطاء صهوة الثّورة٠٠٠أقول هذا الكلام لأنّهم وبمجرّد مرور شهر على قلبان الفيستة أصبحوا أشدّ نضالا من النّضال نفسه٠٠٠!!!!!!!!! فاحذروهم٠٠٠

شكرا لكلّ الرّفاق الذّين عرفتهم منذ ديسمبر2005 ٠٠٠أعي جيّدا أنّ انتماءاتنا السياسية باعدت بيننا كثيرا للأسف الشديد لكنّكم في القلب يا رفاق

الاشتراكي - Le socialiste: مع المصالحة الوطنية لكن مع المحاسبة الجدية

الاشتراكي - Le socialiste: مع المصالحة الوطنية لكن مع المحاسبة الجدية: الكلنا ولاد حوم و نعرفو رئيس الشعبة متاع الحومة كيفاش حالة معاه يحل حانوت من غير باتيندة ويبني عالثاني من غير رخصة وياخو الجعالة باش ولاد ا...

مع المصالحة الوطنية لكن مع المحاسبة الجدية

الكلنا ولاد حوم و نعرفو رئيس الشعبة متاع الحومة كيفاش حالة معاه يحل حانوت من غير باتيندة ويبني عالثاني من غير رخصة وياخو الجعالة باش ولاد الحومة ما يجيهمش استدعاء الجيش و حاصيلو ماشية معاه بالضبط

الكلنا نقراو و نعرفو طلاب سيدي محرز اقصد طلبة التجمع كيفاش يعديو فترة ما بعد انتخابات المجالس العلمية في الحمامات و كيفاش تحل معاهم في فترة الانتخابات بالذات و كيفاش ينجحوا في كل شي ويمشيو يقراو في الخارج

بالنسبة للي مايقراوش الكلنا نخدمو و نعرفو اللي الصباب و الطحان هو اللي يترقى و اللي ياخو كارطة التجمع يترسم و اللي ياخو كارطة في النقابة ما يطولش و يطرد في اقرب فرصة و اللي يصفق برشة و يحني راسو يزيدوه في الشهرية

الكلنا قرينا جرايد و نعرفو كيفاش كل جريدة تبندر و تبارك و تهدي وتناشد وتخصص صفحة وصفحتين للرئيس و حرمه و اعضاء الحكومة في ابسط المناسبات حتى في عيد الشجرة

الكلنا نتفرجو في التلفزة و نعرفو اللي ما فما حتى قناة في تونس ماهياش بنفسجية من ولد بو تونس الحنين الى  المنشطين اللي يدمعو و هوما يمجدو في سيادة الرئيس و سياستو الحكيمة الى باعث القناة اللي صورلنا العايلة المالكة في الدار يعيشو في عيشة بسيطة و في جو عايلي حميم و ما ننساوش اللي مقدمة منوعاتهم و برامجهم المنمقة بالطحين الوطني تنسيهم في موضوع البرنامج جملة وحدة 

الكلنا نعرفو اللي التوانسة الاحرار عاناو الامرين مالاشكال هاذم مالاجيال القديمة حتى لجيلنا متاع توة  وقالو علينا بيوعة و مانحبوش بلادنا لووووول و شوفو كيفاش بنالنا القناطر و كيفاش الحمامات و جو و شيخات كلام ما نحبش نحكيه و عفى الله عما سلف رغم انو اصحابو تملكو بالثورة و هوما الي كانو يقولو 14 بعد الالفين ما ينجمها كان الزين ياخي طلعتلهم قرعة رغم وفرة الطحين

توا في تونس ماعادش تنجم تفرز خاطر انفلونزا الثورة اللي جات سريعة الانتقال من طحان الى اخر اما كل حومة و كل كلية وكل معمل وكل مرفق عمومي فيه ناسو واماليه يفرزو بعضهم

الحكاية موش وقتها توة يا احرار بلادي احنا صبرنا صبرنا هاذومة ناس طحانة حشاكم و يعطيو للذل كارو انجمو نخليوهم مابين بنينا دولتنا و حضرنا منظومتنا القانونية الجديدة و ضمننا مستقبل صغارنا باش يعيشو في دولة ديمقراطية اجتماعية بالاساس الخطر توة من الخفافش اكثر منو  مالثعالب فما شكون يهدد مستقبلنا و حاضرنا و ماضينا و يهدد جمهوريتنا و يستعمل في عواطفنا و في سخونية دمنا على ديننا و يعمللنا في التحريض و في الارهاب الفكري و يخلقلنا في عقدة الاحساس بالذنب

يا عباد راهو بينكم و بين ربي ما فماش واسطة وراهو سيدنا محمد عليه الصلاة و السلام خاتم الانبياء موش راشد الغنوشي و راهو المهدي المنتظر موش متاعنا  ويلزمنا نعرفوا الي السياسة ما تكون ناجحة كان ما تقوم عالديمقراطية والديمقراطية ما تكون ناجحة كان ما تتعدى بصناديق الاقتراع و صناديق الاقتراع ماش تخرج عباد عندها السلطة و عباد يقعدوا معارضة و يمارسوا الضغط عاللي عندهم السلطة باش يحكمو بعدل و بانصاف

معناها كان السيد اللي يحكي باسم ربي ياخو السلطة و يحل فيها شاطح باطح وانا نعارضو ساهل برشة يقتلني خاطر انا نعارض فيه ويردني نعارض في ربي

و كان كل مواطن يسال روحو الفلوس الي قاعدة تتصرف عالزواولة منين جات و كريان الستادات و الوتلة فلوسو منين تو يعرف اللي ما ينجم يصرف كيما التجمع كان المسخين اللي كيفو واللي يعمل الخير ربي قال اللي يلزمو يعملو في الناس المحتاجة موش في الناس المنخرطة

حاصيلو ما نبعدش بيكم بعيد و نرجعو الى موضوعنا خليونا نتلهاو بالجميعة هاذم بعد نرجعو لصحيباتنا لخرين "الطحانة" صحيح يلزمنا نحننو قلوبنا و نعملو مصالحة وطنية خاطر ثلث الشعب متورط

والي كانو كالضبع ياكلو في الجيفة وفي الفضلة والفتفات عن جهل او لحاجة او لخصاصة نكبرو معاهم قلوبنا خاطر هوما ماصورو شي كان الفتفات اما يا صحيبي الجماعة اللي مصونا يلزمنا نحاسبوهم في جمهوريتنا الديمقراطية كيما قال العقيد معمر الي ان شاء الله ما يعمرش "طحان طحان لحاس لحاس  رقاص رقاص" باش ما نوصلوش نشوفو سفاح كيما مختار الرصاع شادد التلفزة في تونس كيما صاير تو

وهكاكة المصالحة تكون بالرسمي وطنية تراعي مصلحة الوطن و ترجع كرامة ابناء الوطن اللي عفصو عليهم طحانة النظام السابق وبيادق بن علي في التجمع اللادستوري اللاديمقراطي  واللي هوما

على التوالي من 1987 الى 14جانفي2011

والمتعاقبون على هذه الخطط

اعضاء الديوان السياسي

الامناء العامون و نوابهم

اعضاء اللجنة المركزية

اعضاء الهياكل الاستشارية و القاعدية

الكتاب العامون للجان التنسيق 

رؤساءالجامعات

رؤساء الشعب

وخاااااااااااااااصة الصبابة والقوادة

وسنحاسبهم في جمهوريتنا الديمقراطية الاجتماعية بكل حزم و دون تهاون و من ضمن الاسئلة التي اقترحها "من اين لك هذا" و في الختام شكرا الى كل احرار تونس اللي خلاوني نعيش ثورة ونتنفس حرية في شارع الحبيب بورقيبة و كان السرياطي و الا رشيد عمار عندهم يد في تقطيعة بن علي وخروجو من البلاد هو و الي  خذات الباك بعدي والدكتوراه قبلي وانا مازلت ماخذيتش جرد اجازة في القانون ماانجم كان نشكرهم و نشكر كل عبد عندو يد في الحكاية

وعيشكم خاطر وسعتو بالكم معايا 

امين مطيراوي

هاذوما الي حققوا اهداف الثورة

تحرق البوعزيزي و تشوشط و انتفض الشعب التونسي و ثار و قطع بن علي و من وقتها و نحن نغنيو في غناية تحقيق اهداف الثورة اللي جات من اجل الكرامة وطرد و كنس الديكتاتورية

تتالت الحكومات الانتقالية و تعملت الهيئة وتبدل اسمها وولات هيئة لتحقيق اهداف الثورة لكن حتى حد مانجم يحقق اهداف الثورة كيما الجماعة اللي ماش نحكيلكم عليهم

واليكم جملة من اهداف الثورة اللي حققوها

غزوة القروان الاولى ومنعو فيها التوريست مالدخول ال سيدي الصحبي و سكروه

غزوة القروان الثانية وهددوا فيها التاكسيستية باش ماعادش يطلعو البنات العراية وللتوضيح عراية معناها ما يلبسوش حجاب

غزوة الحمامات المرازقةطردو فيها لعباد مالبحر وتوعدوهم بصيف بوه كلب كان مازالو يعومو عراية

غزوة العمران

هجمو فيها عالسهريات بالعصي بداعي مقاومة الفسق و الفجور

غزوة افريكا الشهيرة كسرو فيها الباب ودخلو للقاعة و ضربو بالقاز خاطر في امخاخهم ربي سبحانو بعث رسول و هبط قران جات نادية الفاني عملت فيلم قالت فيه راو فما عباد مايمنوش بربي ياخي خافو لا يلحد كل من يتفرج على الفيلم

غزوة باب بنات و هي غزوة فريدة من نوعها تضرب فيها المحامي الشهير صاحب المقولة الشهيرة"بن علي هرب تنفسوا الاسلام يا توانسة الشعب التونسي مسلم" وتكسرت فيها قهوة

غزوة الفايسبوك والغزوة هاذي مافهمتهاش بوه على خوه تنحاتلهم قناعة انو ربي يحمي وولاو هوما يحميو في ربي ويتعاركو شكون مسلم اكثر من صاحبو والكلهم خليني ساكت خير تقول الاسلام دخل لتونس بعد ىالثورة والتوانسة كانو يعبدو في "رع" الاه الشمس

غزوة كلية العلوم بتونس و اللي رفضت فيها منقبة خلع النقاب قبل ما تدخل تعدي و كي كبشو معاها جابت تعزيز متمثل في  جماعة بولحية مربطين و ما تفضت كان ما تدخل الجيش

غزوة قليبية وجا فيها واحد على حصان ناري اي دراجة نارية ومعاه مرسول يهددو فيه بافساد تظاهرة القطب الديمقراطي الحداثي بالمكان استغفر الله يعني لا يزي ديمقراطي و زيد حداثي و بعد صلاة المغرب عملو هجوم عالمكان و ماتفضت كان بالجيش

غزوة حي التضامن و هجموا فيها الجميعة عالصالة المغطاة اللي عمل فيها حزب العمال تظاهرة متاعو و دشدشو بلار الشبابك الكل اما حمة الناطق الرسمي باسم حزب العمال قال خاطيهم والهجوم رجس من عمل البوليس السياسي واللحي الكل ملصقة بالكولفور الحلال والحمد لله

على كل شكرا على تحقيق اهداف الثورة يا جماعة

امين مطيراوي

مواطن تونسي بعد اذنكم